Lideri i opozitës ruse, Alexei Navalny, ka deklaruar se kancelarja gjermane Angela Merkel e vizitoi atë në spitalin e Berlinit, ku ai u mjekua pasi u helmua.

“I jam shumë mirënjohës kancelares Merkel që më vizitoi në spital”, shkroi ai në mediat sociale, transmeton portal arbresh.info

Kritiku 44-vjeçar i Kremlinit u lirua nga spitali Charite në Berlin javën e kaluar pasi mori trajtim për disa javë për ekspozimin ndaj Novichok.

Ai u sëmur gjatë një fluturimi nga Siberia për në Moskë, gjatë muajit gusht, në atë që aleatët e tij thonë se ishte një sulm i kryer nga shteti, ndërsa laboratorët në Francë, Gjermani dhe Suedi konfirmuan se ai ishte helmuar.

Gazeta gjermane “Der Spiegel” raportoi dje se Merkel e kishte vizituar Navalny në spitalin Charite në Berlin, ndërsa takimi u përshkrua si ‘takim sekret’.

Navalny konfirmoi takimin, por argumentoi se etiketimi “sekret” nuk ishte i saktë, duke thënë: “Përkundrazi, ishte një takim privat dhe familjar.”

Kremlini ka mohuar akuzat për përfshirje në helmim dhe akuzoi udhëheqësit perëndimorë për fillimin e një fushate dezinformimi mbi sëmundjen e liderit të opozitës./arbresh.info/